አቶ አንዳርጋቸው አሰግድ ነሐሴ 27 ቀን 1934 ዓ.ም በአዲስ አበባ ከተማ ተወለዱ። የመጀመሪያ ደረጃ ትምህርታቸውን በተፈሪ መኰንንና በአቃቂ አድቬንቲስት ሚሲዮን ትምህርት ቤቶች ካጠናቀቁ በኋላ አምቦ በሚገኘው የግብርና ሞያ ትምህርት ቤት፣ ከዚያም ዓለማያ የእርሻ ኮሌጅ እና በጀርመን አገር ከፍተኛ ትምህርታቸውን አጠናቀቁ። በተጨማሪ የሥነ-ፖለቲካ ትምህርት በበርሊን ከተማ ተከታትለዋል።

በቅድመ-አብዮት ዓመታት በአውሮጳ የኢትዮጵያ ተማሪዎች እንቅስቃሴ ውስጥ አቶ አንዳርጋቸው ከፍተኛ ሚና የተጫወቱ ሲሆን በተለይ የመኢሶን መሥራች አባልና የአመራሩም አካል በመሆን፣ በ1967 ዓ.ም ደግሞ ከአውሮጳ ወደ ኢትዮጵያ ተመልሰው የመሬት ይዞታና አስተዳደር ሚኒስቴር ባልደረባ፣ እንዲሁም የየካቲት 66 የፖለቲካ ትምህርት ቤት መምህርና ዳይሬክተር በመሆን በኢትዮጵያ የለውጥ እንቅስቃሴ ታሪክ ውስጥ ከፍተኛ ሚና ትጫውተዋል።

መኢሶን ቀደም ሲል ከደርግ ጋር መሥርቶት የነበረውን ጊዜያዊ ትብብር በነሐሴ ወር 1969 ዓ.ም ሲያቋርጥ አንዳርጋቸው በመጀመሪያ በሲዳሞ፣ ከዚያም በአዲስ አበባና በጎረቤት አገር ተቀምጠው የድርጅቱን ሥራ በህቡዕ ሲያካሂዱ ከቆዩ በኋላ በ1971 ዓ.ም ወደ ቤልጂየም ለመሰደድ ተገደዱ።

በነሐሴ 1983 ከመኢሶን እስከተሰናበቱበት ጊዜ ድረስ፣ የድርጅቱ ዋና ፀሐፊና የውጭ ልሣኑ የ“ለአዲሲቱ ኢትዮጵያ” አዘጋጅ ሆነው ሠርተዋል። ከ1982 ጀምሮ በብራስልስ ከተማ ቤልጅየም ከ1992 ጀምሮ ደግሞ በምዕራብና በምሥራቅ አፍሪካ አገሮች የተለያዩ ሰብዓዊ ድርጅቶች ሥራ አስኪያጅ በመሆን እየሠሩ ይገኛል።